ಮೂಡುಬಿದಿರೆ : ಬಡಜನರಿಗೆ ಹೆಚ್ಚು ಬಾಧೆ ಕೊಡುವುದು ಆರೋಗ್ಯದ ಸಮಸ್ಯೆ. ಜನರ ಬೇಡಿಕೆ ಕೇವಲ ಮೂಡುಬಿದಿರೆಯನ್ನು ತಾಲೂಕು ಮಾಡುವುದಾಗಿರಲಿಲ್ಲ ಬದಲಾಗಿ ತಾಲೂಕು ಮಟ್ಟದ ಆಸ್ಪತ್ರೆ ಮತ್ತು ಸವಲತ್ತು ಬೇಕು ಎಂಬುದಾಗಿತ್ತು ಆದ್ದರಿಂದ ಉತ್ತಮ ಸವಲತ್ತುಗಳೊಂದಿಗೆ ತಾಲೂಕು ಮಟ್ಟದ ಆಸ್ಪತ್ರೆಯನ್ನು ನೀಡಿ ಎಂದು ಸಿಪಿಐ(ಎಂ)ನ ಜಿಲ್ಲಾ ಮುಖಂಡ ಮುನೀರ್ ಕಾಟಿಪಳ್ಳ ಆಗ್ರಹಿಸಿದರು.
ಅವರು ಸಿಪಿಐ (ಎಂ)ಮೂಡುಬಿದಿರೆ ತಾಲೂಕು ಸಮಿತಿ ನೇತೃತ್ವದಲ್ಲಿ ಗುರುವಾರ ತಾಲೂಕು ಆಡಳಿತ ಸೌಧದ ಮುಂಭಾಗ ನಡೆದ ‘ಸರಕಾರಿ ಆಸ್ಪತ್ರೆ ರಕ್ಷಿಸಿರಿ’ ‘ಖಾಸಗಿ ಆಸ್ಪತ್ರೆ ನಿಯಂತ್ರಿಸಿರಿ’ ಎಂದು ಒತ್ತಾಯಿಸಿ ಪ್ರತಿಭಟನೆಯನ್ನುದ್ದೇಶಿಸಿ ಮಾತನಾಡಿದರು.
ಕಳೆದ ಆರೇಳು ವರುಷಗಳ ಹಿಂದೆ ಜಿಲ್ಲೆಯಲ್ಲಿ ಸರಕಾರ 5 ತಾಲೂಕುಗಳನ್ನು ಘೋಷಣೆ ಮಾಡಿದೆ ಆದರೆ ಜನರಿಗೆ ಅಗತ್ಯವಾಗಿ ಬೇಕಾಗಿರುವ ಉತ್ತಮ ಗುಣಮಟ್ಟದ ಆಸ್ಪತ್ರೆಗಳಿಲ್ಲ.
ಮೂಡುಬಿದಿರೆ ವಿಧಾನ ಸಭಾ ಕ್ಷೇತ್ರದಲ್ಲಿರುವ ಮುಲ್ಕಿ ಮತ್ತು ಮೂಡುಬಿದಿರೆಯ ಸಮುದಾಯ ಕೇಂದ್ರಗಳಲ್ಲಿ ಪಮ೯ನೆಂಟ್ ವೈದ್ಯಾಧಿಕಾರಿಗಳಿಲ್ಲ, ಬಡಜನರಿಗೆ ಬೇಕಾಗುವ ಸೌಲಭ್ಯಗಳಿಲ್ಲ ಇದರಿಂದಾಗಿ ತಾಲೂಕು ಆಸ್ಪತ್ರೆಯ ಹಂತಕ್ಕೆ ತಲುಪದೆ ಖಾಸಗಿ ಆಸ್ಪತ್ರೆಯ ತೆಕ್ಕೆಗೆ ಹಾಕುವ ನಿಧಾ೯ರವನ್ನು ಕೈಗೊಂಡಿದೆ ಈ ಬಗ್ಗೆ ಶಾಸಕರು ಮೌನ ವಹಿಸಿದ್ದಾರೆಂದು ಆರೋಪಿಸಿದರು.
ಸಿಪಿಐ(ಎಂ)ನ ರಾಜ್ಯ ಕಾಯ೯ದಶಿ೯ ಮಂಡಳಿ ಸದಸ್ಯ ಯಾದವ ಶೆಟ್ಟಿ, ಜಿಲ್ಲಾ ಕಾಯ೯ದಶಿ೯ ಮಂಡಳಿ ಸದಸ್ಯ ವಸಂತ ಆಚಾರಿ, ಜಿಲ್ಲಾ ಸಮಿತಿ ಸದಸ್ಯೆ ರಮಣಿ ಅವರು ಮಾತನಾಡಿ ಮೂಡುಬಿದಿರೆ ಸರಕಾರಿ ಆಸ್ಪತ್ರೆಯನ್ನು ಖಾಸಗಿ ಆಸ್ಪತ್ರೆಯ ತೆಕ್ಕೆಗೆ ಹಾಕುವುದಕ್ಕೆ ತಮ್ಮ ವಿರೋಧವನ್ನು ವ್ಯಕ್ತಪಡಿಸಿದರು.
ಪುತ್ತಿಗೆ ಗ್ರಾ. ಪಂನ ಮಾಜಿ ಅಧ್ಯಕ್ಷೆ ರಾಧ, ಪ್ರಮುಖರಾದ ಗಿರಿಜಾ ಮತ್ತಿತರರು ಪ್ರತಿಭಟನೆಯಲ್ಲಿ ಭಾಗವಹಿಸಿದ್ದರು.
